အာဆင်နယ်နည်းပြ မီကဲလ် အာတီတာ (Mikel Arteta) က TNT Sports နှင့် ပြောကြားရာတွင်- “အနိုင်ရတာနဲ့ ဂိုးမပေးရဘဲပွဲပြီးတာကို အရမ်းပျော်ပါတယ်။ အရမ်းခက်တဲ့ ပြိုင်ဘက်တစ်သင်းကို ရင်ဆိုင်ခဲ့ရတာပါ။ ကျွန်တော်တို့ ပွဲကို ကောင်းကောင်းစတင်နိုင်ခဲ့တယ်၊ ဂိုးသွင်းနိုင်ခဲ့တယ်၊ ပြီးတော့ အခွင့်အရေးကောင်းတွေ အများကြီး ရခဲ့တယ်။” “နည်းနည်းလေး ပွင့်သွားခဲ့လို့ ဂိုးမပေးရအောင် ဒေးဗစ် [ရာယာ] က အကောင်းဆုံး ကာကွယ်ပေးခဲ့ရတယ်” ဟု ပြောကြားခဲ့သည်။
ဂိုးမပေးရခြင်းနှင့် ပတ်သက်၍- “ဒါက လုပ်ဖို့ အရမ်းခက်တဲ့ကိစ္စပါ။ ဒါကြောင့် ကောင်လေးတွေကို ချီးကျူးရပါမယ်။ ဒီပြိုင်ပွဲမှာ ခက်ခဲတဲ့ ပြိုင်ဘက်တွေကို ရင်ဆိုင်ရာမှာ ကျွန်တော်တို့ ပြသခဲ့တဲ့ တည်ငြိမ်မှုက အံ့ဩစရာပါ။ စနေနေ့ [ဝက်စ်ဟမ်နှင့်ပွဲ] မှာ ထပ်ကစားရပါဦးမယ်” ဟု ဆိုသည်။
Gabriel ထွက်သွားခြင်းနှင့် ပတ်သက်၍- “သူ ပထမပိုင်းမှာ ကန်ချက်ကြောင့် နည်းနည်း ဒုက္ခရောက်နေလို့ ထုတ်ပယ်ဖို့ ဆုံးဖြတ်ခဲ့တာပါ” ဟု ရှင်းပြခဲ့သည်။
အာဆင်နယ်အတွက် အဖွင့်ဂိုးသွင်းခဲ့သော တိုက်စစ်မှူး ဂါဘရီယဲလ် မာတီနယ်လီ (Gabriel Martinelli) ကလည်း TNT Sports နှင့် ပြောကြားရာတွင်- “ဒါက ချန်ပီယံလိဂ်ပါ။ အိုလံပီယာကော့စ်က အရမ်းကောင်းတဲ့ ကစားသမားတွေနဲ့ တကယ်ကို ကောင်းမွန်တဲ့ အသင်းတစ်သင်းပါ။” “ပထမပိုင်းမှာ ဂိုးတွေ ပိုသွင်းနိုင်ခဲ့တယ်။ အခွင့်အရေးတွေလည်း ရခဲ့တယ်။ ဒါပေမဲ့ ဒါက ချန်ပီယံလိဂ်ပဲလေ” ဟု ပြောကြားခဲ့သည်။
သူ့ရဲ့ဂိုးနှင့် ပတ်သက်၍- “ဗစ်တာ [ဂျိုကိုရက်စ်] ရဲ့ ဂိုးလားဆိုတာကို ခဏစောင့်ကြည့်ဖို့ ကြိုးစားခဲ့တယ်။ ပြီးတော့ တိုင်ထိပြီး ကျွန်တော် ဂိုးသွင်းခဲ့တာပါ။ ကောင်းတဲ့ဂိုးဖြစ်လို့ ဂိုးသွင်းနိုင်တာနဲ့ အနိုင်ရတာကို ပျော်ပါတယ်” ဟု ဆိုသည်။
ချန်ပီယံလိဂ် ပထမဆုံးနှစ်ပွဲနိုင်ခြင်းနှင့် ပတ်သက်၍- “ကျွန်တော်တို့က အာဆင်နယ်အတွက် ကစားတာပါ။ ဖြစ်နိုင်ရင် ရာသီတိုင်း ပွဲတိုင်းကို အနိုင်ရချင်တယ်။ ပြီးတော့ ရနိုင်တဲ့ ဖလားတိုင်းကို အနိုင်ရချင်ပါတယ်” ဟု ပြောကြားခဲ့သည်။
